Shifrat e AKEP per 2011-n, mbi 6 celulare per cdo shtepi

Publikuar me : 26.01.2012 Ne : Ekonomi dhe Biznes - 64 Lexime. Origjina : Gazeta Shekulli

Emirjon Senja

Aplikacionet e shumëllojshme dhe fushata agresive e kompanive celulare ka rritur ndjeshëm numrin e përdoruesve të kësaj telefonie në vend duke bërë që Shqipëria të ketë një normë penetrimi më të lartë se ajo mesatare e vendeve të Bashkimit Evropian. Të dhënat e publikuara sëfundmi nga Autoriteti i Komunikimeve Elektronike dhe Postare (AKEP) pasqyrojnë një përdorim të gjerë te telefonisë celulare në vend, stimuluar kjo është nga shtrirja modeste e rrjetit të telefonisë fikse.

 

Abonentët

Numri i abonentëve të telefonisë celulare përllogaritet të jetë rreth 4 milionë e 740 mijë në një popullsi prej rreth 2.8 milionë banorë. Me një përllogaritje të thjeshtë, del se çdo shqiptar ka mesatarisht 1.7 aparate celulari në përdorim. Të dhënat më të fundit të dala nga Censusi, tregojnë se një familje shqiptare përbëhet mesatarisht nga 3.8 persona. Në këtë mënyrë, del se në çdo familje të tillë gjenden mesatarisht 6 celularë e gjysmë.

Mësohet se vetëm gjatë gjashtë muajve, numri i përdoruesve të telefonisë celulare u rrit me të paktën 200 mijë. Fenomeni i të pasurit nga një numër për dy, tre apo katër kompani celulare pasqyrohet edhe nga një tjetër tregues: abonentët preferojnë të bëjnë më shumë thirrje brenda rrjetit për shkak të çmimeve më të ulta apo ofertave që aplikojnë kompanitë për abonentët. Rritja e thirrjeve telefonike është karakterizuar nga ato brenda rrjetit, ndërkohë që kanë renë thirrjet jashtë tij. “Terminimi i thirrjeve në totalin e thirrjeve të terminuara ka një rritje prej rreth 6 për qind, krahasuar me 6 mujorin e I-rë 2010, ndërsa terminimi i thirrjeve hyrëse nga rrjetet e tjera celulare ka një rënie prej rreth 3.6 për qind krahasuar me 6 mujorin e I-rë 2010”, – shpjegon AKEP.

 

Thirrjet

Ulja e çmimeve është përkthyer në rritje të thirrjeve telefonike. Mësohet se gjatë periudhës në fjalë, çdo përdorues ka komunikuar gjatë një muaji mesatarisht 181 minuta. Pjesa më e madhe e minutave të komunikuara kanë qenë thirrjeve hyrëse. Pjesa dërrmuese e përdoruesve janë abonentë me parapagesë, ndërsa vetëm 8.6 për qind e tyre janë abonentë me kontratë.

 

 

Interneti, 17 perqind e abonentëve e kanë me bandë të gjerë

Interneti ka njohur vitet e fundit një zgjerim të ndjeshëm duke bërë që shqiptarët të kenë mundësi marrjen e shërbimit me bandë të gjerë në familjet e tyre. AKEP konfirmon se deri në fund të qershorit 2011, numri i familjeve që kishin lidhur internetin në shtëpitë e tyre ishte rreth 140 mijë të tilla ose rreth 17 për qind e familjeve në Shqipëri. Biznesi ndërkohë është më i interesuar për këtë shërbim, duke bërë që të lidhen rreth 10 mijë të tillë me internet me bandë të gjerë.

Rritja e numrit të përdoruesve të internetit vjen për shkak të investimeve që kanë bërë operatorët në shtrirjen e linjave të reja por edhe ofrimit të shërbimit 3G nga kompanitë celulare. Aktualisht, janë dy licenca 3G në treg dhe AKEP është përgatitur për të lëshuara të tretën duke zgjeruar numrin e përdoruesve të internetit me bandë të gjerë.