Shkembim zjarri mes dy grupeve, plagosen pese vete

Publikuar me : 14.10.2011 Ne : Kronike - 87 Lexime. Origjina : Gazeta Shekulli

Nga Erjola Azizolli

Ende pa kaluar 24 orë nga vrasja e 33-vjecarit Klodian Lumani i cili humbi jetën mbrëmjen e kaluar në qytetin e Beratit pasi u qëllua me armë zjarri, një tjetër ngjarje e rëndë ka ndodhur. Krismat e armëve kanë tronditur lagjen “Dëshmorët e Kombit” në hyrje të këtij qyteti, ku dy grupe të rinjsh kanë qëlluar ndaj njëri-tjetrit me armë zjarri ku si rezultat kanë ngelur të plagosur pesë persona, mes të cilëve dy vëllezër që ndodhen në gjendje të rëndë për jetën. Ngjarja ndodhi rreth orës 21:00. I plagosur ka ngelur dhe një kalimtar i rastit, por fatmirësisht ndodhet jashtë rrezikut për jetën. Fatos Çobo, i njohur me pseudonimin Loloshi, 40 vjeç, së bashku me Ardit Hasanin, 25 vjeç, mësohet se mbrëmjen e sotme kanë qenë në shoqërinë e njëri-tjetrit duke ecur në një nga rrugicat e lagjes ” Dëshmorët e Kombit” në kohën që janë qëlluar me armë zjarri nga vëllezërit Andi dhe Leli Valva, 30 dhe 25 vjeç. Sapo dy vëllezërit kanë nisur të qëllojnë me armë zjarri ndaj Çobos dhe Hasanit, këta dy të fundit mësohet se janë kundërpërgjigjur duke qëlluar në drejtim të tyre. Të katërt këta persona janë plagosur. Gjithashtu plumbat kanë kapur edhe një kalimtar. Të plagosurit u dërguan me urgjencë drejt spitalit të qytetit. Burime nga Reparti i Kirurgjisë në spitalin e këtij qyteti bëjnë me dije se rreth orës 21:10 kanë mbërritur të plagosur në gjendje të rëndë dy vëllezërit Andi dhe Leli Valva, të cilët kanë marrë plagë të shumta në trup dhe janë transportuar me urgjencë drejt Spitalit Ushtarak në Tiranë për ndihmë më të specializuar. Ndërkohë që aktualisht në spitalin e Beratit është duke iu nënshtruar ndërhyrjes kirurgjikale i plagosuri tjetër Fatos Çobo. Në vendin e ngjarjes kanë mbërritur ekspertët e policisë, të cilët kanë nisur hetimet për të mësuar motivet e kësaj ngjarjeje të rëndë.