Shkoder, dy familje i japin fund hasmerise

Publikuar me : 04.01.2012 Ne : Kronike - 47 Lexime. Origjina : Gazeta Shekulli

Pas një muaji hasmërie mes tyre, dy familje në Shkodër i kanë shtrirë dorën e pajtimit njëri-tjetrit. Familjet Lici e Paja, banuese në fshatrat Golem e Dobraç të komunës Rrethina në Shkodër, i kanë dhënë fund hasmërisë me ndërhyrjen e misionarëve të paqes e pajtimit në Shkodër.

Ata kanë ndërmjetësuar tek familja Lici nga fshati Golem, djali i së cilës me 1 dhjetor të vitit të kaluar, Eugen Lici19 vjeç u plagos në këmbë në afërsi të një pike karburanti në këtë fshat.

Autori i kësaj ngjarje, 26-vjeçari Albert Paja, 26 vjeç, banues në fshatin Dobraç, është ndaluar nga policia disa orë pas ngjarjes. Pas kësaj dy familjet janë përfshirë në hasmëri dhe sipas kryetarit të shoqatës së misionarëve të paqes, Mustafa Daija, ato kanë ndërmjetësuar për ditë të tëra për pajtim mes dy familjeve.

Kjo u realizua pas një muaji në ditën e tretë të këtij viti ku pjesëtarë të dy fiseve, në prani të misionarëve të paqes i dhanë fund hasmërisë duke shtrirë dorën e pajtimit. Besë Lici, babai i të plagosurit është shprehur se dëshiron që çdo gjë të mbyllet këtu dhe me familjen Paja të jetojnë si miq e shokë pa probleme mes tyre.

Gjergj Paja, babai i autorit të plagosjes është shprehur se me familjen Lici kanë një njohje 50-vjeçare dhe i kanë respektuar gjithmonë. Sipas traditës pjesëtarë meshkuj të dy familjeve kanë shkëmbyer vizita tek njëri- tjetri dhe kanë premtuar pajtim dhe miqësi mes tyre. Ngjarja ku u plagos në këmbë 19-vjeçari ndodhi pas një grindjeje të çastit. /Anila Dushi/