Shkoder, shperthen makina, plagoset kambisti. Dyshohet per atentat

Publikuar me : 13.10.2011 Ne : Kronike - 80 Lexime. Origjina : Gazeta Shekulli

 

Një shpërthim i fuqishëm ka ndodhur në një mjet tip Benz duke plagosur rëndë drejtuesin e tij.

Ngjarja ka ndodhur në 06.40 në lagjen “Vasil Shanto” në qendër të qytetit të Shkodrës pranë tregut të shkëmbimit të valutës. Mjeti tip Benz me targë SH 1465 E që drejtohej nga Mark Gjoni, 50 vjeç, me banim në Shkodër, ka ardhur nga rruga e Fakultetit të Shkencave të Natyrës dhe është parkuar në fund të saj tek kryqëzimi i tregut valutor,në parkingun pranë një pallati,jo larg kishës ortodokse.

Sapo ka parkuar mjetin dhe e ka fikur atë, një shpërthim i fuqishëm i shoqëruar me zjarr ka përfshirë mjetin. Drejtuesi i tij, 50-vjeçari Mark Gjoni është mundur të nxirret nga mjeti me dëmtime të rënda dhe është dërguar në spitalin e Shkodrës ku ndodhet në gjendje kritike. Kanë qenë persona që punojnë në tregun valutor dhe dyqanet e zonës ata që sapo kanë dëgjuar shpërthimin, janë përpjekur t’i japin ndihmën e parë të dëmtuarit. Një mjet zjarrëfikës ka bërë shuarjen e zjarrit.

Sipas policisë akoma nuk dihet shkaku i shpërthimit, por dyshohet se në mjet ka qenë e vendosur lëndë plasëse që është aktivizuar nga largësia. Për të patur të dhëna më të sakta, nga Tirana kanë ardhur specialistët përkatës. Mark Gjoni punonte si kambist dhe është vëllai i një punonjësi policie në Shkodër. Policia akoma nuk ka dhënë versionin e saj për ngjarjen,  shkaqet, pistat e hetimit apo autorët e dyshuar. Anila Dushi