Shqiperia dhe mania e kartolinave

Publikuar me : 17.02.2012 Ne : Sociale - 37 Lexime. Origjina : Gazeta Shekulli

Jorida Pasku

Ekspozita “Ide të freskëta” e hapur për një javë në galerinë FAP të Universitetit të Arteve, i prezantoi vizitorëve një mori modelesh të kartolinave publicitare të krijuara në Shqipëri, Bullgari, Greqi, Itali, Gjermani, Francë, Izrael, Brazil, Australi, Indi. Aktiviteti ndërkombëtar i organizuar nga Maniacard për 5-vjetor, bëri të mundur edhe një ballafaqim mes ideve, koncepteve, dizajnit për më të interesuarit në fushën e dizajnit edhe mes teknikave të realizimit.

Synimi kryesor në këtë përvjetor ishte prezantimi i ecurisë së zhvillimit të kartolinave publicitare, “si një mjet komunikimi urban i jetës së qyteteve dhe kryeqyteteve kryesore të botës”. Kujtojmë, që para 5 vitesh, Maniacard në Shqipëri u prezantua si medium nëpërmjet kartolinës me sloganin “Be cool, be smart, have a free cards”), më tej erdhi kartolina e parë e porositur nga një klient, që  u pa si një mjet për reklamim brand-i dhe këtë vit, u arrit deri te lidhja me ‘botën online’, përmes një kodi QR (QR code). Me një kartolinë Maniacard dhe telefoni smartphone, gjithkush ka mundësi të hyjë në faqe interneti, të  komunikojë në rrjetin social facebook dhe videot në youtube.

Pavarësia në qendër Kartolinat publicitare të Maniacard në Shqipëri vijojnë të tërheqin vëmendjen për dizajnin, idetë dhe sloganet e gjetura që i përgjigjen mendësisë së përgjithshme. Përmendim sloganet e reklamave të tjera të porositura në këtë medium, ato celulare që në çdo ofertë të re tërheqin nga titujt e mëdhenj në postera e banera “për të përjetuar magjinë e festave”, të kompanive të sigurimit që pyesin: “A mendoni se edhe ankesat e fqinjëve janë një problem më vete?”, ato të pijeve alkolike që “ftojnë në festën më të madhe në Shqipëri”. Këtë vit Maniacard i ka kushtuar një kartolinë publicitare

100-vjetorit të Pavarësisë. Pas saj janë të shkruara vargjet e Himnit Kombëtar. Nëpërmjet QR code mund të dëgjohet edhe muzika.
Bretkosë apo princ? Pyetet në të tjera kartolina publicitare që ftojnë të zbulosh kodin, “A e dini se në vitin 2100…?”….ka të mbishkruar një tjetër, “Të mbrojmë të drejtat tona” ‘thirret’ diku… “Shqipëria së bashku për Evropën”. Maniacard ngacmon me slogane të qarkulluara për një kohë të gjatë në Shqipëri.