Siguria ne stadiume, do te shtohen 200 police

Publikuar me : 25.11.2011 Ne : Sport - 40 Lexime. Origjina : Gazeta Shekulli

Rritja e dhunës në stadiumet shqiptare ka sjellë dhe propozimin e Ministrisë së Brendshme për të shtruar me 200 punonjës administratën e Policisë së Shtetit. Ky vendim është arsyetuar dje nga kreu i kësaj ministrie, Bujar Nishani, i cili ka sqaruar anëtarët e Komisionit të Sigurisë se ka lindur nevoja që efektivët të transportohen nga një qytet në tjetrin në rastet e ndeshjeve. Ndaj, në prezantimin e buxhetit për vitin e ardhshëm mbi këtë ministri, kreu i kësaj administrate bëri të ditur shtimin e forcave të policisë me 200 punonjës.

“Do të shtohen 200 policë. Ka një rritje të dhunës në stadium gjë që na ka detyruar të lëvizim forcat policore nga Tirana në Korçë apo Lezhë. Ky aktivitet ka qenë përgjegjësi e jona për t’i shtuar patrullave të policisë punonjës dhe një pjesë do të shkojë tek policia kufitare”, deklaroi Nishani.

Një gjë e tillë u kundërshtua nga nënkryetari i Komisionit të Sigurisë, Ilir Gjoni, deputet socialist: “Të gjithë punonjësit që janë në Drejtorinë e Përgjithshme të Policisë të ikin nga aty, pasi janë në kurriz të atyre që punojnë në terren. Duhet të bëhen shkurtime në Drejtorinë e Përgjithshme, pasi administrata është e fryrë artificialisht.

Në këtë mënyrë jo nuk do të keni nevojë që të merrni 200 të tjerë”. Një prej kushteve të opozitës për të miratuar këtë buxhet është mosshtimi i 200 punonjësve në strukturat e Policisë së Shtetit. Projektbuxheti për Ministrinë e Brendshme u miratua dje në parim me 7 vota të mazhorancës kundrejt 6 të opozitës. D.Dedej