Singapori, “vatra” e trukimeve boterore

Publikuar me : 20.12.2011 Ne : Sport - 41 Lexime. Origjina : Gazeta Shekulli

 

Pas skandalit të basteve në Itali, fshihet një rrjet ndërkombëtar që i ka shtrirë tentakulat e tij në shumë prej vendeve të mëdha evropiane. Ky fakt pranohet nga prokurori i Kremonës, Roberto Di Martino, i cili po merret me hetimin e skandalit të basteve në Serinë A, e cila bëri bujë gjatë kësaj vere në vendin fqinj. Sipas Di Martinos, koka e rrjetit është në Singapor, dhe pas saj gjenden me qindra persona, të cilët vënë në lëvizje shuma të mëdha parash të thata drejt celulave të shpërndara në mbarë botën dhe sidomos në vendet perëndimore.

Di Martino theksoi se rrjeti është i përhapur dhe në vende të tjera si Gjermania, Zvicra, Kroacia dhe Finlanda, ku vetëm pak ditë më parë u arrestua një person, i cili ishte dënuar në Gjermani, dhe që kishte një skemë të saktë për mënyrën sesi funksionon gjërat me drejtuesit aziatik. Gjithashtu gjatë hetimit të prokurorisë së Kremoës, rezultoi se krahu i djathtë i drejtuesve nga Singapori në Itali, ishte i ashtuquajturi grup i “ciganëve”, që gjatë verës u përfolën dhe si trukuesit numër 1 të ndeshjeve në Kategorinë Superiore të Shqipërisë, meqenëse pjesa më e madhe e kësaj bande ciganësh, përbëhet nga shqiptarë, rumun dhe bullgarë.

Këta të fundit kanë tentuar gjatë muajit shtator dhe nëntor, që të manipulonin ndeshje të Kupës së Italisë, mes dy skuadrave të Serisë B, ku lojtarëve iu është ofruar një shumë prej 200 mijë eurosh për të trukuar rezultatin e ndeshjes. Di Martino bëri të ditur, se rrjeti nuk luante shuma të mëdha parash nga një person i vetëm, por vendoste bast nga 500 deri në 1500 nga qindra persona të ndryshëm.