Siri, spitalet shnderrohen ne vende torture

Publikuar me : 25.10.2011 Ne : Rajoni - 88 Lexime. Origjina : Gazeta Shekulli

Ndërsa pjesa më e madhe komunitetit ndërkombëtar i gëzohet ekzekutimit të ish-liderit libian, Muamar Gedafi, në Siri forcat e sigurisë së presidentit Bashar al Assad vazhdojnë shtypjen e lëvizjes për reformat. Tashmë në Siri, as spitalet nuk janë një vend i sigurt, të paktën ato shtetërore. Denoncimi vjen nga një raport i Amnesty International, e cila ka vëzhguar qendrat spitalore në Banias, Homs e Tell Kalakh dhe spitalin ushtarak në Homs.

Në vend që të kurojnë të plagosurit, stafi mjekësor merr pjesë në torturat e tyre, kjo para betimit të Hipokratit. Forcat e rendit janë parë të enden nëpër spitale, duke marrë me vete të plagosurit, shpesh herë edhe me tubat e oksigjenit në hundë.

Ndërsa në muajt e fundit, numri i të plagosurve me armë zjarri në protestat që kanë përfshirë vendin është rritur, që prej majit numri i të shtruarve në spital ka rënë ndjeshëm. Ky është një sinjal që forcat opozitare e shohin më të udhës të kurohen në vende të tjera sesa në spitalet shtetërore.

Për të plagosurit mbetet i rrezikshëm edhe kurimi në klinikat private, pasi furnizimet me gjak bëhen vetëm nga Banka Qendrore e Gjakut, institucion në varësi të Ministrisë së Mbrojtjes dhe një kërkesë për gjak do të thotë t’ia dorëzosh fatin e të plagosurit burgjeve dhe “kurave” të forcave të sigurisë. Në burgjet siriane, numri i të vdekurve ka arritur mbi 100.

Dëshmitë që vijnë nga “Amnesty International” janë drithëruese. Një mjek në shërbim i spitalit ushtarak në Homs pranon se ka parë të paktën 4 kolegë të tij dhe 20 infermiere të kryejnë abuzime me pacientët. Në spitalin shtetëror të Tell Kalakh, në 22 gusht është çuar një burrë që kishte mbetur pa ndjenja pas dhunës barbare të ushtruar mbi të nga forcat e sigurisë. Një dëshmitar shprehet: “7 ose 8 policë, disa të armatosur me pushkë dhe disa infermiere e kishin rrethuar. Sapo hapi sytë dhe pyeti se ku ndodhej, ata iu hodhën përsipër dhe e rrahën barbarisht”.

Një dëshmi tjetër flet për bastisjen e spitalit Al-Birra al-Khadamat në Homs, në kërkim të njërit prej organizatorëve të opozitës. Pasi nuk u gjet në spital, forcat e sigurisë arrestuan 18 të plagosur. Një pjesëtar i personelit i ka thënë “Amnesty International” se një prej pacientëve u mor me forcë, duke e shkëputur nga makineria e oksigjenit.

Edhe vetë punonjësit e shëndetësisë shpesh janë në shënjestër të forcave të sigurisë, për shkak të mjekimit të të plagosurve. Shpesh ata arrestohen dhe gjatë marrjes në pyetje rrihen brutalisht. “Na thuhej: Doni të flisni apo doni të torturoheni? Kanë akuzuar kolegët e mi se kanë kuruar të plagosurit pa lajmëruar autoritetet dhe u kanë kërkuar emrat e tyre”, thotë një prej mjekëve.