Socialistet miratojne draftin per ndryshimet ne statut

Publikuar me : 26.10.2011 Ne : Politike - 65 Lexime. Origjina : Gazeta Shekulli

Nga Denis Dedej

Grupi i Punës për Reformën në PS, i kryesuar nga Edi Rama, ka miratuar dje variantin final të statutit të partisë, i cili do të miratohet në Asamble dhe Kongres. Në mbledhjen e zhvilluar mbrëmjen e djeshme, e cila zgjati për më shumë se tre orë, deputetët socialistë kanë diskutuar midis tyre për ndryshimet që duhet të pasohen në dokumentin themeltar të selisë rozë. Burime nga ky takim bëjnë të ditur për gazetën “Shekulli” se në këtë takim është vendosur një variant përfundimtar, teknikalitetet e të cilit do të punohen nga deputetët për të nxjerrë dhe dokumentin që do t’i dorëzohet anëtarësisë për diskutim.

Në ndryshimet thelbësore që do të pësojë statuti do jetë forcimi i organizative në çdo Qendër Votimi. Pas problemeve të hasura në zgjedhjet e fundit vendore, socialistët kanë vendosur që të ketë një presion më të madh në bazë për ta kthyer këtë në një strukturë të fortë elektorale. Kjo do të shoqërohet edhe me një rritje të përgjegjësitë e bazës. Nëse deri më parë ishte deputeti i zonës apo kryetari i komunës ose i bashkisë që mbante përgjegjësinë për rezultatin e dobët në zonat që administrojnë, çdo person që do të jetë pjesë e strukturave do të jetë pjesë e analizës dhe do të ketë njëlloj përgjegjësi. Burimet sqarojnë se marrja e kësaj mase i detyron strukturat që të punojnë jo vetëm për anën elektorale, jo vetëm për të mbrojtur kutitë e votimit në ditën e zgjedhjeve, por që të përgatiten për mbrojtjen e votës nga vjedhja përmes manipulimit të listës.

Këto ndryshime, por edhe çështje të tjera që kanë të bëjnë me organizimin e Partisë Socialiste do t’i nënshtrohen diskutimeve në forumet më të larta të saj. Për këtë arsye, pas shumë kritikash dhe zërash për mungesën e mbledhjes së Kryesisë së Partisë Socialiste, kjo e fundit është vendosur nga deputetët socialistë të që të mblidhet ditën e enjte. Mbledhja e Kryesisë do të shënojë një hap të rëndësishëm në drejtim të rrugës që po ndiqet nga selia rozë për të shkuar në punimet e Kongresit që do të zhvillohen më 5 nëntor. Mësohet se në këtë mbledhje Kryesie do t’u jepet mandati delegatëve që kanë fituar në zgjedhjet e zhvilluar javën e kaluar dhe do të miratohet programi i ri politik, si edhe ndryshimet në statut. Pas kësaj mbledhje, kjo një prej forumeve që prej kohësh nuk mblidhej në Partinë Socialiste do të thërrasë Asamblenë Kombëtare për të miratuar përfundimisht rendin e ditës dhe dokumentet që do të përdoren në Kongres. Mbledhja e djeshme e Grupit të Punës për Reformën Organizative në PS ka nisur në orën 19:00 dhe ka përfunduar në orën 22:20, pak orë para mesnate.