Sulm i dyfishte ne Siri, TV shteteror Pas eshte Al Kaeda

Publikuar me : 23.12.2011 Ne : Rajoni - 84 Lexime. Origjina : Gazeta Shekulli

Një atentat i dyfishtë është kryer sot në Damask ndaj ndërtesës së shërbimeve të sigurisë. Sulmet e kryera nga dy kamikazë, sipas televizionit shtetëror është vepër e organizatës terroriste Al Kaeda.

Televizioni shtetëror sirian ka njoftuar sot se njëri sulm ka ndodhur në afërsi të institucionit së Sigurisë së Shtetit (Amn al Dawla) në lagjen kryesore të Damaskut, ndërsa tjetri në lagjen Kafr Susa.

Regjimi sirian bazohet në një sistem kontrolli dhe represioni, i cili u është besuar katër agjencive kryesore: Siguria e Shtetit, Siguria Politike, Shërbimi i sigurisë Aeronautike, Shërbimet e sigurisë Ushtarake.

Sipas televizionit sirian, në njërin sulm, autobomba e drejtuar nga një kamikaz është përplasur në hyrjen e ndërtesës së Sigurisë së Shtetit, duke shkaktuar viktima dhe të plagosur, por numri i tyre nuk është bërë ende i ditur.

Ndryshe nga vendet fqinje si Iraku dhe Libani, në Siri atentatet me karakter eksploziv janë të rralla. Sulmi i dyfishtë i mëngjesit të sotëm vjen pak orë para mbërritjes në Damask të ekipit të Observatorit të Ligës Arabe, i cili është i ngarkuar të përgatisë terrenin për operacionin që nis në fund të dhjetorit.

Prej 10 muajsh, regjimi në Siri është tronditur nga protesta të përgjakura. Në disa zona, dhuna ushtarake dhe policore ka bërë të krijohen grupe rezistence, të përbëra nga ushtarë dezertorë dhe civilë, ndërsa regjimi i presidentit Asad ia atribuon terroristëve dhe ekstremistëve islamikë dhunën e nisur që prej marsit të këtij viti.

Ndërkohë, në protestat e sotme janë të paktën 4 civilë të vrarë nga forcat e regjimit në lagjen Bab Amro, çka e çon në 41 numrin e viktimave në 24 orët e fundit.