Tirane, grabitet nje pike e faturimit te ujit

Publikuar me : 30.09.2011 Ne : Kronike - 39 Lexime. Origjina : Gazeta Shekulli



Burime nga policia bëjnë të ditur se një grabitje me armë ndodhi mesditën e sotme në një pikë të pagimit të faturave të Ujësjellës Kanalizimeve në kryeqytet. Ngjarja ndodhi në rrugën Bako Dervisha, në  afërsi të Shkollës së Baletit rreth orës 13:40. Sipas policisë grabitësi ka kërcënuar me armë zjarri tip pistoletë punonjësen e kësaj pike, e cila e traumatizuar i ka dhënë kërcënuesit të gjithë shumën që dispononte arka.

Mësohet se në këtë pikë arkëtimi faturash të ujësjellësist në momentin e grabitjes ndodhej vetëm arkëtarja, e cila është përballur me grabitësin e vetme. Nga dëshmitë e para mësohet se grabitësi rreth 1.60 cm i gjatë, kishte veshur një bluzë të zezë me xhinkse, dhe mbante në kokë vetëm një kapele.

Grabitësi me një qese në dorë dhe nën kërcënimin e pistoletës  ka kërkuar gjithë sasinë e parave që ndodheshin në arkë dhe dyshohet se ai është larguar me një shumë prej 1 milion lekësh të vjetra, por ende nuk është bërë i gjithë inventari i sasisë së parave që ndodheshin në këtë pikë momentin e grabitjes

Punonjësa, e cila nuk ka pësuar lëndime po merret në pyetje, ndërkohë që në hetimet e policisë janë përfshirë edhe dëshmitarë të rastit apo kamerat që ndodheshin në lokalet rreth pikës së arkëtimit, të cilat mund të ndihmojnë në një identikit të grabitësit.

Uniformat blu janë vënë menjëherë në punë për të zbardhur ngjarjen si dhe kapjen e autorit.  Mësohet se kjo nuk është grabitja e parë që ka ndodhur në këtë pikë, pasi sipas policisë ajo rezulton të jetë grabitur edhe dy herë të tjera.