Topalli- Opozites Rishqyrtim te ligjeve me 3/5, nje vend ne Keshillin Mbikqyres te BSH-se

Publikuar me : 31.10.2011 Ne : Politike - 69 Lexime. Origjina : Gazeta Shekulli

Sot në Konferencën e Kryetarëve, Kryetarja e Kuvendit Jozefina Topalli kërkoi që ligjet që kërkojnë 3/5 e votave të Kuvendit, të shqyrtohen për herë të dytë në komisionet përkatëse parlamentare.

Konferenca ka pranuar propozimin e Topallit, e cila vlerësoi se kjo është një ofertë tjetër për t`i dhënë mundësi përsëri opozitës të sjellë propozime për këto ligje, për të çuar kështu përpara procesin e zbatimit të 12 rekomandimeve të BE-së.

Në njoftimin e zyrës së shtypit në kryesinë e Kuvendit, theksohet se Topalli ka kaërkuar që të bëhet gjithçka për miratimin e ligjeve me 3/5 e votave pasi ato kanë qenë gjithnjë në axhendën e parlamentit.

Kryetari i Grupit Parlamentar Socialist, Gramoz Ruçi dhe nënkryetari i Kuvendit, Namik Dokle, kërkuan që në kalendarin 3 javor të punimeve të parashikohet rishikimi i Rregullores së Kuvendit, por Topalli sqaroi se rishikimi i Rregullores është tashmë i përfshirë në kalendarin e punës, i votuar në datë 13 tetor 2011 në seancë plenare.

Ndërkaq zyra e shtypit të Kuvendit njofton gjithashtu se Topalli dhe kreu i grupit të deputetëve demokratë Astrit Patozi kanë bërë dhe një ofertë tjetër opozitës. Oferta konsiston që nga tre kandidatura që propozohen dhe miratohen nga Kuvendi për Këshillin Mbikqyrës të Bankës së Shqipërisë, një të propozohet nga PD-ja, një nga PS-ja dhe një nga LSI-ja, si shprehje e vullnetit për bashkëpunim.