Topi sfidon Berishen Nese Presidenti zgjidhet nga populli, fitoj kunder cilitdo

Publikuar me : 26.12.2011 Ne : Politike - 97 Lexime. Origjina : Gazeta Shekulli

Presidenti i Republikës Bamir Topi i është kundërpërgjigjur akuzave Kryeministri Sali Berisha. Ky i fundit e akuzoi Topin për anësi gjatë ushtrimit të detyrës së presidentit. Presidenti deklaroi se deri ditën e fundit të mandatit do ti qëndroi zotimit për të ruajtur parimet kushtetuese, të cilat flasin për një president mbi partitë politike.

“Deri në momentin e fundit, që unë do të jem në Presidencë, do respektoj Kushtetutën e vendit dhe kurrsesi nuk mund të shkoj sipas dëshirave të partive që të jem apendix i orekseve politike të partive politike, pavarësisht se cili është “background”-i politik i Presidentit. Pra, unë dëshiroj që të siguroj qytetarët shqiptarë që, pavarësisht insinuatave që hidhen, Presidenti do të mbetet President deri në sekondën e fundit të mandatit të tij”, u shpreh Topi.

Në këtë mënyrë Topi bëri të qartë se ndryshe nga se është përfolur nuk do të ketë lëvizje për formonin e një partie tjetër të djathtë pa përfunduar mandatin e presidentit – mandat i cili përfundon në korrik të vitit 2012. Në këtë pikë, Topi theksoi se e gjitha që po flitet është shenjë e friksës nga drejtuesit e PD-së.

“Ata që kanë frikë për të ardhmen politike pastaj, atëherë është çështje e tyre. Nuk kam faj unë, nëse unë kthehem në obsesion ndaj të tjerëve. Unë jam njeri i drejtpërdrejtë. Atë që e them, e them vet dhe nuk ka nevojë që ta thonë të tjerët”, është shprehur Topi.

Presidenti ka ana tjetër e ka “sfiduar” Berishën, duke i thënë se nëse Presidenti do të zgjidhej në mënyrë të drejtpërdrejtë nga populli, atëherë ai do të ishte fituesi i padiskutueshëm.

“Në rast se, zotërinjtë që kanë në dorë ndryshimet kushtetuese, për të bërë zgjedhjen e Presidentit ashtu sikurse e meriton, nga populli. Nëse do të ketë një ndryshim të kësaj natyre, që zor se do të ketë, sepse janë vet politikanët që i druhen verdiktit popullor, unë do të jem në garë dhe, e ftoj cilindo që të jetë në garë për të marrë verdiktin drejtpërdrejtë nga njerëzit e thjeshtë, nga populli”, deklaroi Topi gjatë vizitës në Durrës.

 

 

* * *

 

Presidenti Bamir Topi ka zgjedhur sot Kavajën për të përcjellë urimet e festave të fundvitit për gjithë shqiptarët.

Kreu i shtetit është pritur nga të paktën 2000 qytetarë të Kavajës, ndërsa më pas ka zhvilluar një takim me kryebashkiakun Elvis Roshi dhe përfaqësues të klerit mysliman në bashkinë e qytetit.

Vizita e kreut të shtetit ka vijuar në azilin e qytetit, ku Topi ka shpërndarë dhurata e urime për të moshuarit.

Presidenti ka ndaluar edhe në Durrës, ku është pritur nga kryebashkiaku Vangjush Dako.

Pas takimit në bashkinë e qytetit bregdetar, Topi nuk ka bërë asnjë deklaratë me karakter politik, ndërsa ka vijuar vizitën me një ceremoni në Pallatin e Kulturës, ku ka dhënë medalje për dy aktorët e njohur Roland Koço, Aishe Stari dhe basketbollistin Niko Prockolaj.  / M. Brunga