“Shqipëria është gati të bashkëpunojë për hetimin e trafikut të organeve në Kosovë.” tha kreu i delegacionit shqiptar në OSBE, Aldo Bumçi. Deklarata e Bumçit erdhi në Asamblenë Parlamentare të OSBE-së ndërkohë që pretendimet mbi trafikun e organeve nga pala serbe janë mbështetur nga Dik Marti dhe prokurorja Karla Del Ponte. Në një panel ku merrte pjesë dhe ministri i jashtëm serb, Vuk Jeremiç, Bumçi tha se Shqipëria ka bashkëpunuar më herët në këtë çështje me Tribunalin e Hagës dhe kjo është e vetmja alternativë për të pasur rezultate sa më të shpejta nga ky hetim.  Ndërkohë, duke iu referuar deklaratave të deputetit shqiptar, ministri serb Jeremiç tha se Serbia e mirëpret deklaratën e përfaqësuesit të Shqipërisë.

“Ne e mirëpresim inciativën e Shqipërisë për tu bërë pjesë e hetimit si dhe falenderojmë përfaqësuesin e saj për deklaratën.”, tha Jeremiç.

Hetimi i cili do të nisë nga një njësi speciale, vjen si rezultat i raportit shumë të kundërshtuar të Dik Martit dhe akuzave të Karla del Pontes. Kjo e fundit ka shprehur dëshirën e saj për të kryesuar hetimin e Hashim Thaçit dhe zyrtarëve të tjerë në të ardhmen. Duke pranuar bashkëpunimin në hetim, Shqipëria bie në kundërshtim me deklarimet e mëparshme. Drejtuesit e mazhorancës e kanë dënuar ashpër raportin e raporterit të KiE-së, Dik Marti ndërkohë që vetë kryeparlamentarja Topalli është shprehur se Marti keqpërdori besimin e evropianëve.  /ar/