Shkoder/ Ndoc Dede Voci (Prroj) ka gjetur vdekjen ne oborrin e baneses pasi eshte qelluar nga djali i fqinjit te tij

Dy familjet kishin grindje mes tyre prej kohesh per kanalet vaditese. Diten e ngjarjes policia shoqeroi babane e autorit

SHKODER - Grindja per ujin qe perdoret per vaditje mendohet te kete shkaktuar vrasjen e nje 60-vjecari ne fshatin Kir te Komunes Pult ne Dukagjin.

Ngjarja ka ndodhur ne oret e vona te se merkures dhe mesohet se viktima ka qene ne oborrin e baneses se tij kur eshte qelluar me arme zjarri Sipas policise, e cila e ka marre me vonese njoftimin per shkak te mosfunksionimit te linjave telefonike ne ate zone, 60-vjecari Ndoc Dede Voci (Prroj) ka gjetur vdekjen ne oborrin e baneses se tij pasi eshte qelluar me arme zjarri nga autori i identifikuar si Gjon Qutaj, 23 vjec, fqinj i tij.

Vrasja

Ngjarja ka ndodhur ne lagjen Kasnec ne fshatin malor te Kirit dhe viktima Ndoc Prroj ishte baba i kater femijeve. Burimet e policise shprehen se shkak eshte nje konflikt i hershem i viktimes me fqinjin e tij per shkak te ujit qe perdoret per vaditje. Sipas banoreve te ketij fshati, viktima, lindur e banues ne kete fshat, ka pasur konflikt me familjen Qutaj prej kohesh.

Madje mesohet se edhe te merkuren kryefamiljari Qutaj dhe viktima jane zene me njeri-tjetrin. Madje Ndoc Prroj eshte kanosur nga fqinji i tij cka ka bere qe ai te njoftoje policine, duke u shprehur se rrezikonin ta vrisnin. Nje gje e tille ka bere qe uniformat blu te mberrinin ne vendngjarje dhe te shoqeronin per ne komisariat kryefamiljarin Qutaj.

Por ky veprim nuk duket se i ka qetesuar gjakrat, pasi ndersa ka pare se te atin ia kishin derguar ne qeli, 23-vjecari Gjon Qutaj, ka marre nje arme dhe ka qelluar kunder fqinjit te tij Ndoc Prroj, duke e lene te vdekur. Me pas ai eshte larguar nga vendngjarja, teksa vetem te nesermen eshte bere i mundur identifikimi i tij si autor i vrasjes, si dhe shpallja e tij ne kerkim.

Problemet

Fshati Kir ne komunen e Pultit ne Dukagjin eshte nje fshat malor ku ka pak toke, vetem ajo rreth banesave dhe banoret e perdorin ujin per vaditje sipas radhes, pasi kanalet perkatese mungojne. Banoret e ketij fshati kane hapur vete kanale per ta marre ujin nga lumi dhe perdorur per te ujitur tokat dhe shpesh kjo eshte bere burim konfliktesh qe kane shkaktuar dhe vrasje.

Vetem para 3 muajsh, grindja per ujin solli vrasjen e 33-vjecarit Zek Tonaj dhe plagosjen e babait te tij Ndue Tonaj, ngjarje kjo e ndodhur ne qendren e komunes Shale ne zonen e thelle malore te Dukagjinit ne Shkoder, ne fshatin Breg Lumi. Vrasja e 60-vjecarit Ndoc Prroj eshte e gjashta qe ndodh gjate ketij viti ne qarkun e Shkodres.