Ditët e fundit në vendin tonë janë shtuar vatrat e zjarrit të cilat kanë shkaktuar jo pak dëme materiale. Ministri i Brendshëm Bujar Nishani në një konferencë për shtyp i bëri sot apel drejtuesve të Policisë së Shtetit dhe të Emergjencave Civile në qendër dhe në qarqe që të angazhohen maksimalisht në parandalimin dhe ndërhyrjen e menjëhershme në rastet e rënies së zjarreve.

Veçanërisht ministri kërkoi nga strukturat hetimore të Policisë së Shtetit të hetojnë dhe të dërgojnë për ndjekje penale të gjithë personat përgjegjës për vënien e zjarreve.

“Këto procedura hetimore e ligjore duhet t`i kryeni si ndaj individëve të caktuar që kanë shkaktuar zjarre, ashtu edhe për mosveprim të personave përgjegjës të administratës vendore të ngarkuar për mbrojtjen e pyjeve e kullotave, pronë të pushtetit vendor”, tha Nishani.