Vizita ne Nju Jork, Berisha U takova me te gjithe te medhenjte e kesaj toke

Publikuar me : 26.09.2011 Ne : Politike - 99 Lexime. Origjina : Gazeta Shekulli

Mbledhja e grupit parlamentar të Partisë Demokratike u shndërrua në një tablo të vizitës së kryeministrit dhe delegacionit që e shoqëronte në Nju Jork. Duke e cilësuar vizitën në vendin symbol të demokracisë si më të zgjaturën dhe më intensiven e karrierës së tij politike, Berisha u shpreh se Shqipëria pati mundësinë që gjatë takimeve me krerët e përfaqësuesit e shteteve të të gjithë botës të paraqiste arritjet, përpjekjet dhe vizionin e saj për të ardhmen.

“Paraqitëm para botës arritjet e Shqipërisë, përpjekjet dhe vizionin e saj. Vizita ishte gjithashtu edhe një përpjekje për të lobuar për njohjen e pavarësisë së republikës së Kosovës. Drejtimi i dytë i veprimtarisë sonë në Nju Jork ishte organizimi i forumit të parë amerikan për biznesin në Shqipëri, në kryeqytetin e biznesit dhe afarizmit, si dhe takimet intensive me drejtues të korporatave të këtij vendi të mëdh të interesuar në fusha të ndryshme. Drejtimi i tretë kryesor ishte në përputhje me pasionin tim për mediat: përdorimi i mundësive që të jep kryeqyteti mediatik i botës për të paraqitur edhe ne në copën e diellit që na takon arritjet e Shqipërisë para botës nëpërmjet mediave”, tha Berisha para deputetëve demokratë.

“Veprimtaritë politike u konkretizuan me një seri takimesh të shumta, biseda dhe shkëmbime mendimesh pothuaj me të gjithë të mëdhenjtë e kësaj toke që ndodheshin në këtë konferencë. Presidentin Obama, kryeministrin japonez, ai i Britanisë, Suedisë, Austrisë, sllovenisë, Kroacisë, Norvegjisë, Malit të Zi, Gjeorgjisë, ministrin e Jashtëm të Gjermanisë, Holandës, Belgjikës, takim me kryetarin e këshillit tranzitor të Libisë, Xhibril, kryeministrin e Kuvajtit etj”, tha Berisha.

G.N. / Redaksia online