Vrasja e 18-vjecarit ne Shijak, ndalohet autori

Publikuar me : 24.08.2011 Ne : Kronike - 49 Lexime. Origjina : Gazeta Shekulli

Policia ka arrestuar sot  15-vjeçarin e dyshuar si autori i vrasjes së bashkëmoshatarit të tij mbrëmjen e kaluar në qytetin e Shijakut.

E. Sh., 15 vjeç, banues në lagjen Kodër të Shijakut, është ndaluar sot rreth orës 04.00, në afërsi të qytetit të Peqinit.  Në momentin e ndalimit, 15-vjeçarit iu gjet një thikë-biçak, me të cilën ai ka kryer krimin mbrëmjen e së martës.

Ngjarja ndodhi mbrëmë në Shijak, në kohën kur Boris Elezi, 18 vjeç, është qëlluar me thikë teksa po shkonte për në shtëpi. Sipas burimeve, gjithçka ka nisur mëngjesin e së martës në një bilardo, ku 18-vjeçari ka qenë duke luajtur dhe po ashtu edhe 15-vjeçari i dyshuar si vrasës i tij.

Mësohet se ka pasur një konflikt mes të dyve dhe si rrjedhojë, Elezi e ka qëlluar me shuplakë adoleshentin, i cili e ka mbajtur “vëth në vesh” ngjarjen. Kështu, ai ka pritur momentin kur rivali i tij është nisur për të shkuar në shtëpi dhe ka qenë errësirë, dhe e ka ndalur duke e goditur në anën e djathtë të barkut me thikë.

Dy goditjet e marra mësohet se kanë qenë vdekjeprurëse për 18-vjeçarin Elezi, i cili humbi jetën rrugës duke shkuar për në spital. Për ngjarjen mësohet se ka pasur dëshmitarë dhe rreth një orë më pas policia e Shijakut ka mbërritur në shtëpinë e adoleshentit të dyshuar E.S., por nuk e ka gjetur atë.

Si rrjedhojë ai është shpallur në kërkim. Motivet banale janë kthyer në shkaqe vdekjesh të njëpasnjëshme ditët e fundit në të gjithë vendin.

Mark Brunga