Publikuar me : 25.12.2011 Ne :
Kuriozitete - 69 Lexime. Origjina : Gazeta Shekulli
Poezi nga Arben Duka
Po të thirri zë’ i dashurisë,
dëgjoje dhe ndiqe nga pas,
po të thirri zë’ i dashurisë,
bëje të shenjtë atë çast!
Po të thirri zë’ i dashurisë,
i vetmi zë i vërtetë,
dëgjoje vetëm dëgjoje,
dhe rend pas Tija në jetë!
Po të thirri zë’ i dashurisë,
do jesh njeriu me fat,
dëgjoje dhe ndiqe nga mbrapa,
se jeta nuk është aq e gjatë!
Po të thirri zë’ i dashurisë,
të tjerët janë zëra prej Kotit,
i kthjellët si tingull kambane,
i shenjtë si zëri i Zotit!
Po të thirri zë’ i dashurisë,
mos i ik-mos iu fshih-mos iu tret,
se kamban’e shenjtë e asaj zemre,
veç njëherë të kumbon në jetë!
Po të thirri zë’ i dashurisë,
kudo që të jesh ti përgjigju,
dhe akull i ngrirë të jesh,
ti ndizu-ti ndizu dhe digju!
Po të thirri zë’ i dashurisë,
mos ik, asnjëherë mos i ik,
ai të thërret veç njëherë,
magjinë e tij mos e fik!
Po të thirri zë’ i dashurisë
mos i trego, asnjeriu
dhe veten përjetë do ta ndjesh
si para Zotit, Moisiu
