Zidane dhe Di Stefano “avokatet” e Murinjos

Publikuar me : 22.01.2012 Ne : Sport - 40 Lexime. Origjina : Gazeta Shekulli

Dy prej lojtarëve më të mëdhenj të Realit të Madridit, Alfredo di Stefano dhe Zinedin Zidane, kanë dalë dje në mbrojtje të trajnerit, Hoze Mourinjo, pas disfatës zhgënjyese të radhës ndaj Barcelonës. Mourinjo është kritikuar gjërësisht për taktikat e tij mbrojtëse gjatë humbjes 2-1 në Kupën e Mbretit, që u rëndua edhe më shumë nga shkelja me këmbë e Pepes të dorës së Lionel Mesit.

Di Stefano u shpreh për “Marca”, duke thënë se t’i hedhësh fajin trajnerit portugez është njësoj si të bësh “një shaka të papranueshme”. “Mourinjo rritet gjithmonë përballë sfidave të mëdha, ai është aq i zoti, sa ç’duhet të jetë një trajner i Realit”, shkroi Di Stefano. “Gabimet mund të korrigjohen”. Zidane, i cili ka rolin e drejtorit sportiv të Realit tani, mbroi vendimin e Mourinjos për të aktivizuar Pepen në mesfushë, përpara një mbrojtjeje fizike, që përbëhej nga Altintop dhe Karvaljo, një lëvizje e kritikuar jashtë mase.

“Sigurisht që një klub si Reali ka nevojë të shfaqë elegancë, por në këtë moment, ndaj një rivali ekstremisht të vështirë, duhet të krijosh kushtet e duhura për fitore”, tha ish-mesfushori i Francës për “AS”. “Një sulm ndaj Mourinjos dhe lojtarëve është sulm mbi Realin”. Zidane, i cili ka udhëtuar me ekipin dhe është përfshirë gjithashtu në stafin teknik të Mourinjos, doli në mbrojtje edhe të Pepes, reputacioni negativ për lojë agresive i të cilit u rrit ndjeshëm pas ndeshjes të së mërkurës.

Pepe kërkoi falje ndaj Mesit të enjten, duke thënë se nuk kishte shkelur me qëllim dorën e majtë të lojtarit të Barcelonës. “Ai është një djalosh i dashur dhe një person i edukuar mirë”, tha Zidane për mbrojtësin portugez. “Por, kur futet në fushë ai fiksohet pas dëshirës për të fituar dhe kjo gjë e nxit atë të bëjë gabime. Ndonjëherë ai kalon në limit”. Reali udhëton drejt “Camp Nou”-t për të luajtur me Barçën ndeshjen e kthimit të çerekfinales së Kupës së Mbretit, të mërkurën e ardhshme.